La Baraa

المدونة

المتجر

السلة

post hero

الشفرات وسمك الشعر: الحقيقة والخرافة

Jan. 2, 2021, 12:26 a.m.

وحدة من المعلومات الخاطئة

استخدام الشفرة🪒 يزيد سمك الشعر ويخليه ينمو بسرعة!!!!

صارررر هواي وهاي الخرافة موجودة ومتداوله ومحد يعرف مصدرها.

السؤال: هل ازالة الشعر بالشفرة من اي مكان بالجسم هل يزيد سمكها ويخليها تنمو اسرع؟؟!!

الجواب:

الشعر الموجود وصارله اشهر، الها نهايات رفيعة وناعمة وافتح لونًا.

الشعر المحلوق،اول ماتبدي تنمو من الجلد الها ملمسك خشن لان قصت من المنتصف ولان نمو الشعر بيها زاوية مائلة،راح تنقص بزاوية فتطلع نهاياتها حادة ،واذا تركتها تطول راح ترجع عدها نهاية رفيعة وناعمة.

تبدو اغمق لان قصت من المنتصف وبعدها جديدة واسمك وممتعرضة للعوامل البيئية

وهمين اذا تركناها فترة بدون حلق اتصير نهايتها ارفع وانعم وافتح لونا وهكذا......

مختصر الكلام

لون الشعر وسمكها ومعدل النمو يتكون ويتحدد وراثيا في البويصله(الجذر)

وازالة الشعر بالشفرة لايؤثر على البويصلة لامن قريب ولا من بعيد.

ليش لعد اذا سويتها بالشيرة او المكينه او الشمع تطلع انعم؟!!!

لان الشعراية من تنمو البويصله(بعد مانفصلت بهالطرق)

راح تمر بمراحل نمو يحتاجلها وقت وتمر بالغدد الدهنية الموجودة فوق الجذر فتترطب وتطلع ذات ملمس انعم.

ليش ذكرت الموضوع مو لان اشجع عالحلاقة بالشفرة؟؟!!

لا،

لان من اكول للمريضة الي دتتحضر اتسوي جلسات ازالة الشعر بالليزر،لتشيلين الشعر باي طريقة كانت من الجذر وسويها قبل بيوم من الجلسة بالشفرة او كلما اتشوفيها تطول سويها بالشفرة،

اتفز من مكانها لا دكتورة شلون بالشفرة مو راح يزيد الشعر🥴

بالمناسبه:اكو هواية من الشباب عدهم صلع وراثي ويحبون يزينون شعرهم بالشفرة وبشكل يومي

هم سمعتوا فد يوم واحد منهم رجع شعره ثخين🤭

design and developed by Muntadhar Haydar